TUMFIKIRIE MAMA

      2 Comments on TUMFIKIRIE MAMA

Ameamka mapema, ‘mekatiza usingizi
Tayari nazi kukama, na kuzibandika mbazi
Hata kama ana homa, yabidi kufanya kazi
Ni juhudi zake mama, ili mwana ubarizi
Kabla kujiharibia, tumfikirie mama!

Moto unajiwakia, nusura mtu kuchoma
Yabidi kukurubia, ili kupikike vyema
Yote anavumilia, masikini huyu mama
Nawe unashuhudia, iweje huna huruma?
Kabla kujiharibia, tumfikirie mama!

Mbio zote anakwenda, ili upate elimu
Vilivyo anajipinda, kwa kuwa na yako hamu
Kilo kumi anakanda, uone maisha tamu
Anafikia kukonda, kwa kufanya kazi ngumu
Kabla kujiharibia, tumfikirie mama!

Unapelekwa chuoni, kwa za shida darahima
Anajinyima gauni, ili ukasome vyema
Wajifanya huyaoni, unampuuza mama
Na makundi ya kihuni, vilivyo wayagandama
Kabla kujiharibia, tumfikirie mama!

Mama ana tumaini, masomo utayashika
Ili siku za usoni, usije kuhangaika
Naye awe furahani, mwangaza kummulika
Ila we u taabani, maovu ‘mejipachika
Kabla kujiharibia, tumfikirie mama!

Ulevi unatumia, si pombe si heroini
Darasani ‘mekimbia, unafuata wendani
Unaushika mkia, ufikapo mtihani
Huwezi muhurumia, mama yako masikini?
Kabla kujiharibia, tumfikirie mama!

Mimba unajishikia, mimba kabla ya ndoa
Na bila kufikiria, unaenda kuzitoa
Unajihatarishia, dada basi hili jua
Na pia mola jalia, unamuasi tambua
Kabla kujiharibia, tumfikirie mama!

Subscribe to Blog via Email

Enter your email address to subscribe to this blog and receive notifications of new posts by email.

Join 35 other subscribers

About Farwat Shariff

Farwata ambaye kwamba anatumia lakabu ya ashiki wa kiswahili katika uandishi wake ni kwa sasa hivi mwanafunzi wa somo la uchumi anayeishi Mombasa, Kenya. Aidha ni mjasiriamali, malenga na mwandishi wa kiswahili anayependa na aghlabu huandika kuhusu mambo yanayotokea na kuathiri jamii. Kuandika ni faraja yangu! Watu kuburudika na uandishi wangu ni furaha yangu❤

2 thoughts on “TUMFIKIRIE MAMA

Leave a Reply

Your email address will not be published. Required fields are marked *