HERI YA SIKU YANGU YA KUZALIWA

      2 Comments on HERI YA SIKU YANGU YA KUZALIWA

Siku alopanga Mungu, mie nije duniani
Ulimshika uthungu, hali yake taabani
‘kavumilia mamangu, hadi ‘katoka tumboni
Ewe Mungu ujalie, uwe ni mwaka wa kheri

Tarehe kumi na tatu, na mwezi ni Aprili
‘kazawa mwana wa tatu, kwa uwezo wa jalali
Usiwe mwaka wa kutu, ya rabbi nipe sahali
Ewe Mungu ujalie, uwe ni mwaka wa kheri

Nikafika duniani, tumboni nikapaatha
Na jina wakanipeni, nikaitwa farwatha
Mama ‘kawa furahani, kama alopata patha
Ewe Mungu ujalie, uwe ni mwaka wa kheri

Imani iongezeke, na subira kadhalika
Maovu niyaepuke, nayo mema kuyashika
Vishawishi nivivuke, yasinifike mashaka
Ewe Mungu ujalie, uwe ni mwaka wa kheri

Nayo bidii nitie, katu nisilaze damu
Uvivu usiningie, bali niishike hamu
Ndoto zangu zitimie, matunda yawe matamu
Ewe Mungu ujalie, uwe ni mwaka wa kheri

Uwe mwaka wa sururi, ‘sinitoke tabasamu
Na mengi yalo mazuri, yanifikie kwa zamu
Uwe mwaka wa fahari, nile vitamu vitamu
Ewe Mungu ujalie, uwe ni mwaka wa kheri

Rabbi Naomba baraka, Kwa wote wangu Umri
Nipe na nyingi fanaka, Niepushe na ya Shari
Niwe wa kuheshimika, Nifwate zako amri
Ewe Mungu ujalie, Uwe ni mwaka wa kheri

2 thoughts on “HERI YA SIKU YANGU YA KUZALIWA

Leave a Reply

Your email address will not be published. Required fields are marked *