KUONGEZA MKE IWE SIRI?

      No Comments on KUONGEZA MKE IWE SIRI?

 

Nina swali ikhiwani,ninaomba munijibu
Limekaa akilini,nijibuni maswahibu
Naomba yenu maoni,tena kwa utaratibu
Je ni haki kuongeza,mke wa pili kwa siri?

Mke wako laazizi,barafu ya moyo wako
Kakupa mola mwenyezi,
Utimize dini yako,
Ila leo humaizi,wamficha mambo yako
Je Ni haki kuongeza,mke mwingine kwa siri?

Ni ruhusa sikatai, kutoka kwake rabbana
Sio kwamba haifai,jamani kuoa tena
Ila Ni jambo la hai,Ushauri kutakana
Je Ni haki kuongeza,mke mwingine kwa siri?

Ifikiri hiyo hali,’mkeo ‘takayokuwa
Kugundua jambo hili,kwamba wewe umeowa
Mfanyie usahali,ushauri kuchukuwa
Je Ni haki kuongeza,mke mwingine kwa siri?

Ila pia tafakari,zogo atakalozua
Ukitaka ushauri,huenda kakuzingua
Hivyo basi fanya siri,oa bila ye kujua
Je Ni haki kuongeza,mke mwingine kwa siri?

Aeza leta mashaka, Hilo ukimueleza
Akataka na talaka, na ndoa kuipuuza
Akavuka na mipaka,jamani kwa uke wenza
Je Ni haki kuongeza,mke mwingine kwa siri?

Hivyo simpe habari,kuilinda yako ndoa
Mke mwenza awe Siri,ndoa isingie doa
Ukitaka washa nari,basi Siri we toboa
Je Ni haki kuongeza,mke mwingine kwa siri?

Ni ruhusa ya karimu,hivyo mashaka ondoa
Sio Jambo la haramu,mke wa pili kuoa
Na pia sio muhimu,mke wa kwanza kujua
Je Ni haki kuongeza,mke mwingine kwa siri?

Akija kujua mbele,pia itakuwa kheri
Akileta makelele,mshauri asubiri
Mfanyie mema tele,ili awe na sururi
Je Ni haki kuongeza,mke mwingine kwa siri?

Mwishoni nimefikia,kwaherini waungwana
Mola ‘kitupa afia,tutazidi kujuzana
Jina mnaulizia? Naona mnanongona
Farwa Shariff nawambia,in shaa Allah tutaonana

Leave a Reply

Your email address will not be published. Required fields are marked *